scolart: maggio 2016

L'articolo, a cura di Lucia Gross della Usc di Ladins, parla dei fumetti del personaggio Bertol realizzati dagli studenti delle scuole medie della Val di Fassa e della loro pubblicazione all'interno del giornalino Bertol Comics.

La presentazione è avvenuta il 5 maggio presso la caserma dei pompieri di Pozza di Fassa in occasione dell'Aisciuda Ladina 2016.

BERTOL, SIA STORIA, SIA PATOFIES

En ocajion de l'Aisciuda Ladina l'è stat prejentà l sfoi "Bertol Comics" che tol ite mìngol de storia e n muie de dessegnes e patofies pissèdes dai scolees de la mesènes sun chest personaje

Oramai l'é doventà gran. L'é cresciù, l'à abù sie batum, l'à emparà a jir sun sia giames, a rejonèr, e ades l'à ence descorì sia storia. Chi pa? Ma Bertol, la mascotte de l'Aisciuda Ladina!

Chel pìcol "facera" che recorda l bufon l'era nasciù ti prumes egn '90, canche se tachèa a rejonèr de politica linguistica e de l'emportanza de "tachèr fora" l lengaz, percheche duc posse l veder. Coscita, vardan a l'ejempie de autra mendranzes maores desche chela catalena, Fabio Chiocchetti se aea pissà l slogan "Per ladin? Amò più bel!" e claus Soraperra aea dessegnà apontin l personaje de chel logo che per egn l'é stat metù dal comprenjorie Ladin de Fascia sui placac che aea derit a n contribut, apontin ajache i era scric per ladin.

L'era l "testimonial" naturèl de nosc lengaz e coscì, dò l "restyling" fat da Claus e da Manuel Riz, chel "facera" l'é cresciù e enscin da la pruma edizion de l'Aisciuda Ladina, da pìcol stempel te n cianton, l'é ruà a se tor l post de onor sui placac. L'à abù sie batum ciapen l'inom de Bertol, ti egn l se à adatà a fèr l'ost, l comerziant, l'artejan, l sportif, l ciantarin e ence l volontadif, e l'an passà l'à fat n gran saut ciapan vita e tacan a jir stroz per la scolines sun sia giames, enveze che demò sul lapisc de Manuel.

Chest an l'é sutà fora ence sia storia: la vera storia de Bertol de Micel, che l'è nasciù sun Pian a Ciampedel e l'é jit a studièr a Ladinopolis. La é scrita al scomenz del nef sfoi "Bertol Comics", che é stat prejentà en ocajion de l'Aisciuda Ladina e che apontin Bertol ge à dat fora ai bec da la scolines a la mesènes. N sfoi che tol ite dessegnes e patofies pissèdes dai scolees. n'aon rejonà con sie ideator, l professor Manuel Riz.

Co éla pa nasciuda l'idea de fèr Bertol Comics?

Acà velch an, con Vigile Iori de l'Olfed, aane fat n liber de didatica de comics con Scedola e ogne an te la scola mesèna porte dant velch unità didatica e ence n laboratorie sui comics. Acà doi egn ge aee proponet ai bec de se pissèr stories col Bertol, ajache l'è n personaje nef, e i bec i l'à tout sù n muie ben. Chest an de scola é fat lurèr i bec de la terzes mesènes de Poza e Ciampedel e é fat n laboratorie domesdì con bec de pruma e seconda.

I à lurà ence en cobia, un fajea la storia, un dessegnèa e encoloria: coscì l'è vegnù fora chesta patofies, olache i bec à metù Bertol te situazions desvalives, te n contest local o con Bertol che va a X Factor o adretura su Marte. La idees les é states di bec, gé é cernù de i enrezèr dal pont de veduda tecnich ge dajan vèlch consei. La particolarità de Bertol l'é che l rejona col tabelon che l'à dedant, n aspet che ge va dò al prum personaje di comics Yellow Kid, n bez che l'aea na gran ciameija sala e l prum an che l'é vegnù fora la scrites les era apontin sun sia ciameija.

Co éla che ve aede pissà de fèr la storia de Bertol?

Canche Bertol jia stroz per la scoles duc, soraldut i più pìcoi, ge domanèa da olà che l'è, che numer de ciuzé che l'à, se l'à familia e che che l'à studià e c.i. Ajache l personaje era stat enventà da Claus Soraperra acà n muie de egn, ge é domanà de se pissèr na patofia mìngol da grignèr. Te la pruma piata donca aon metù jù zeche sun sia storia.

Ei bec, co èi tout sù chesta idea di comics?

I à tout sù la doura del ladin a na vida n muie lijiera, i é belebon usé a durèr ladin e talian, dapò a scola i fèsc vèlch ence per ingleis e todesch, e i é n muie averc, no i se fèsc problemes. I à podù desleèr sia fantasìa, ajache l'era n personaje nef che no l'aea jà stories sie e l'é stat bel. Te l'ultima piata dapò aon ence metù a jir n concors olache i bec de duta la val i pel scriver ite tel tabelon de Bertol n slogan da poder durèr ti egn che vegn. Ajache ades i à duc l fonin ge aon dit de fèr na fotografìa e de la manèr te Comun general. L'é jà ruà ite materièl. Bertol l'é n personaje che cresc an dò an, i bec a scola i lo speta a l'é dò che l doventa mìngol più populèr ence te la families.

MUCCA 1

MUCCA 2

ALBERT EINSTEIN

BERTOL COMICS

LA USC DI LADINS 14.5.2016